Ранѓеловиќ за СП: Кризата го подига антагонизмот меѓу Македонците и Бугарите

Одолговлекувањето на проблемот меѓу Македонија и Бугарија ќе направи голема штета за двете општества, вели аналитичарот Иво Рангеловиќ за „Слободен печат“.

– Бугарија влегува во се поголема политичка криза и таквиот курс го компликува интегративниот пат на Македонија. Но, проблемот не е само формален затоа што кризата го подига антагонизмот помеѓу двата народи и ја разгорува еволуцијата во нивните односи. Ако спорот се одолговлечи, ќе дојдеме во ситуација, и покрај евентуално решение, двете држави да се најдат во исклучително лоши односи во функционирањето на двете општества – вели Ранѓеловиќ.

Според него, се поизвесни се трети парламентарни избори во Бугарија, каде техничката влада ја ужива привилегијата да не носи политички одлуки. Затоа, вели тој, клучен фактор во расплетот е меѓународниот фактор.

– Останува опцијата на овој спор да му се даде билатерална (маргинална) димензија преку португалскиот предлог, при тоа издвојувајќи го решението од интегративниот пат на Македонија. Но, тешко е да очекуваме позитивен исход за време на словенечкото претседателство од две круцијални околности. Првата е времето визави резултатската конфигурација од изборите во Бугарија. Втората е конфузната ситуација во која се наоѓа Словенија предводена од претседател кој покрена директна иницијатива за решавање на спорот, а од друга страна со влада предводена од премиер кој е склон на „орбанистика“ и пркоси на секоја можна вредност на ЕУ. Следствено, не смее да ја потцениме улогата на Вашингтон, бидејќи бугарското вето значи и вето за американските интереси во Бугарија и регионот. Токму тоа треба да биде фокусот на македонската дипломатија и евентуалното решение на спорот со официјална Софија – вели Рангеловиќ.

Видео на денот