Рамуш Харадинај поднесе оставка
Косовскиот премиер Рамуш Харадинај поднесе оставка.
Причината е тоа што тој бил поканет да биде испрашуван од страна на Специјалниот суд. Оставката ја поднел на редовниот состанок на Владата, пренесува Косовапрес.
Остaвката на косовскиот премиер е неотповиклива.
Харадинај пред медиумите изјави дека тој поднесе оставка за да ја зачува честа на Косово и да се појави во Специјалниот суд во Хаг како обичен граѓанин.
– Денеска ја информирав Владата, ќе ги известам и другите институции за мојата неотповиклива оставка. Причината е што добив покана од Специјалниот суд како осомничен, следната недела ќе се појавам во Специјалниот суд и оценив дека не можам да се појавам како премиер на Косово, туку ќе се појавам како обичен граѓанин, значи како Рамуш Харадинај, владите и власта се променливи, живееме во демократија, честа на премиерот и на државата мора да се сочува и јас никогаш нема да ја понижувам. Во Хаг одам како Рамуш Харадинај, ќе излезам пред клеветниците така како што бара честа на албанскиот борец – рече Харадинај, пренесува Телеграфи.
Ова е вторпат Рамуш Харадинај да поднесе оставка од функцијата премиер. Во 2005 година, тој поднесе оставка од функцијата премиер, по покренато обвинение за воени злосторства од Хашкиот меѓународен суд.