Рамадани за СП: Во декември Софија ќе ја тргне блокадата
После второто вето за преговарачката рамка испорачано минатата недела на состанокот на ГАК во Луксембург, Софија ќе биде под силен притисок од меѓународната заедница и јас очекувам дека на следниот самит на ЕУ во декември ќе ја тргне блокадата, вели аналитичарот Исмет Рамадани за „Слободен печат“.
– После второто вето од Софија се чувствува како работите да одат во наша полза. Во Софија веќе го чувствуваат притисокот што доаѓа од САД и од ЕУ. Веројатно ќе оценат дека некои барања од декларацијата од нивното собрание се апсурдни и не кореспондираат со цивилизациските текови, стандардите на ЕУ и американската демократија. Со нова политичка влада се очекува Софија да се повлече од нивната политика која вклучува мешање во туѓи државни атрибути. Самото писмо од нивното МНР е индикација дека се повлекуваат – вели Рамадани за „Слободен печат“.
Според него, Македонија треба да ја продолжи комуникацијата со Бугарија после нивните избори и да продолжи да ги гради своите позиции пред ЕУ и САД. Тој верува дека дебатата може да биде од полза, но најважниот чекор треба да го направи Софија.
– Региониот мора да продолжи кон полноправното членство во ЕУ. Нема друга опција. Тоа е геополитика на најмоќните држави и Софија нема да може долго да ѝ се спротиставува. Јас очекувам во декември да биде тргната блокадата – заклучува Рамадани.