Рама со поддршка за Тачи: Апсурдниот процес во Хаг ќе стави печат на чистотата на ОВК
По веста за хашкото обвинение за Хашим Тачи и за оставката што тој ја даде, со поддршка се јави албанскиот премиер Еди Рама и, како што наведува, „цела Албанија“. Рама во објава на Твитер наведе дека оваа истрага против Тачи ќе послужи за разјаснување на чистотата на Ослободителната војска на Косово.
– Хашим Тачи ја има целата поддршка и солидарност на Албанија во оваа битка за Косово и за неприкосновената правда на ослободителната војна. Апсурдниот процес против него, конечно, ќе ја запечати чистотата на ОВК и неможноста да се преразгледува нејзината историја, напиша Рама на Твитер.
Хашим Тачи си поднесе оставка од функцијата претседател на Косово, откако Специјалното обвинителство во Хаг го потврди обвинението против него. Акт е покренат и за лидерот на Демократската партија, екс собрански спикер и поранешен прв човек на косовската агенција за разузнавање, Кадри Весели, како и за Реџеп Селими, координатор на пратеничката група на Движењето „Самоопределување”.