Ракометна Европа ќе има нов шампион, ПСЖ го остави Кил без Ф4
Ракометарите на ПСЖ успеаја да го победат европскиот шампион Кил со 34:28 и да обезбедат пласман на завршниот турнир од Лигата на шампионите кој традиционално се игра во Келн.
ПСЖ реваншот го започна со минус два од првиот натпревар (29:31) но на крајот поранешните вардарци, тренерот Раул Гонзалез и Даинис Криштопанс се радуваа и ќе играат на завршниот турнир во Келн.
Ракометарите на ПСЖ во текот на целиот натпревар имаа предност, во првото полувреме таа најчесто беше изразена со еден или два гола, на одмор заминаа со 16:15, а во сличен ритам се играше и до средината на второто полувреме. Тогаш ПСЖ со двата гола на Пранди и Ремили во 46 минута за прв пат дојде до три гола предност (26:23), а во следниот напад Наи погоди за 27:23. До крајот на натпреварот „ светците“ не само што ја задржаа потребната предност туку и дојдоа до убедлив триумф од шест гола и по петти пат ќе играат на Ф4 турнирот во Келн. Елохим Пранди со девет постигнати голови беше најпрецизен кај ПСЖ, а одлична партија имаа и Недим Ремили со седум и Дилан Наи кој даде шест гола. Кај Кил кој ќе биде европски шампион само половина година, Никлас Едберг и Сандер Сагосен дадоа по седум гола.