Ракометарите со судни маки славеа против Турција
Машката ракометна репрезентација со судни маки успеа да победи на гостувањето кај Турција во квалификациите за ЕП 2020 година и да остане на првото место во групата 3 кое води во вториот шешир на ждрепката. Ракометарите одиграа далеку од очекуваното, со големи падови во играта и благодарение на неискуството на турските ракометари победија со 26:25.
Во првото полувреме, избраниците на селекторот Данило Брестовац одлично почнаа, направија предност од четири голови (4:8) и иако се очекуваше да се продолжи во ист ритам, ракометарите паднаа. Турците успеаја да се вратат, прво дојдоа до резултатски егал, а потоа и ја презедоа контролата и до 10-тина минути пред крајот на натпреварот го диктираа резултатот.
Филип Кузмановски во 49. минута со голот израмни на 21:21, а една минута подоцна Филип Талески донесе и водство од 22:21. До самиот крај се играше гол за гол, кога повторно двоецот Кузмановски и Талевски со два гола донесе предност од 24:26.
Турците брзо одговорија со гол, а по промашениот шут на Лазаров 10-тина метри поради закана за пасивен напад, турските ракометари добија шанса да останат непоразени. Сепак, Никола Митрески го одбрани шутот во последната секунда и донесе два бода со кои речиси е обезбедено првото место во групата 3.
Капитенот Кире Лазаров со седум голови беше најпрецизен во „црвено-жолтиот“ тим, Филип Талески постигна пет голови, додека во редовите на Турција, Пеливан постигна дури 10 голови.