Во рамки на претстојното Европско Првенство во Унгарија и Словачка, македонската сениорска репрезентација со вчерашниот собир во Хотел „Александар Палас“ – Скопје го започна вториот дел од подготовките.

Македонската репрезентација ќе ги одработи последните тренинзи во Скопје пред заминување за унгарскиот Дебрецин, а во истиот период (3 и 4 јануари) ќе се одиграат и контролните натпревари со селекцијата на Израел кои ќе бидат од затворен тип.

Согласно протоколите за учество одредени од Европската Ракометна Федерација, сите ракометари во репрезентативниот табор се имунизирани против вирусот ковид-19, а во текот на подготовките беа извршени превентивни ковид тестирања и истите беа негативни, информираат од Ракометната федерација на Македонија (РФМ).

Протоколот од ЕХФ за учество на ЕП 2022 предвидува ковид тестирања на учесниците на 4, 7 и 10 јануари, а ракометните репрезентативци заминуваат за Дебрецин на 11 јануари. Првиот натпревар е против селекцијата на Словенија на 13 јануари со почеток од 18.00 часот.

Европската ракометна федерација ги објави протоколите за навивачите кои ќе сакаат да присуствуваат на континенталниот собир.