Лошите авио-конекции и неможноста на екипата комплетна да патува во еден авион за Шпанија ги сменија плановите на Металург.

Металург самиот, но и со помош на ЕХФ, бараше комбинации со авион да оди во Шпанија, но на крајот како единствена варијанта остана екипата да патува поделена во два дела, со тоа што едниот дел ќе патуваше од Белград, а другиот од Софија.

Бидејќи, поради корона-кризата, секоја земја има свои протоколи, Металург реши да не ризикува и вечерва ќе тргне со автобус за Шпанија. Патот долг околу 3.000 километри, екипата ќе го мине за околу 40 часа.

Утринава Металург уште еднаш ќе ги тестира сите свои ракометари и навечер, со готовите тестови, ќе тргне на пат. Средбата со Адемар Леон ќе се одигра во вторник, со почеток во 20.45 часот.