Ракометарите ги дознаа противниците за ЕП 2022, група по мерка за Македонија
Македонската ракометна репрезентација заедно со селекциите на Данска, Швајцарија и Финска ќе се бори за освојување на првите две места во групата 7 кои носат пласман на Европското првенство во 2022 година.
Главен фаворит за првото место е селекцијата на Данска, додека главниот ривал за второто место, Швајцарија е добро познат за избраниците на селекторот Данило Брестовац, и од тие натпревари имаме убави спомени.
Во квалификациите за ЕП 2014 година ракометарите остварија две победи над Швајцарија 30:24 и 22:27, а „црвено-жолтите“ беа поубедливи две години подоцна. Тогаш ракометарите на домашен терен ја совладаа Швајцарија со 27:20, а потоа на гости славеа со 26:17.
Македонија има и два настапи против Финска, во квалификациите за СП 2005 година, ракометарите ремизираа играјќи 30:30 на гости, додека на домашен терен славеа со 36:30.
Новиот квалификациски циклус ќе стартува на 4 ноември, а ќе заврши на 2 мај 2021 година. Директен пласман на ЕП 2022 покрај домаќините Унгарија и Словачка обезбедија и финалистите од последниот европски шампионат, Шпанија и Хрватска.
Пласман на ЕП 2022 во Унгарија и Словачка ќе обезбедат двете најдобри репрезентации од секоја група, како и четирите најдобри третопласирани репрезентации, а европскиот континентален ќе се игра од 13 до 30 јануари 2022 година.
ГРУПА 1: Франција, Србија , Белгија, Грција
ГРУПА 2: Германија, Австрија, БиХ, Естонија
ГРУПА 3: Чешка, Русија, Украина, Фарски Острови
ГРУПА 4: Исланд, Португалија, Литванија, Израел
ГРУПА 5: Словенија, Холандија, Полска, Турција
ГРУПА 6: Норвешка, Белорусија, Летонија, Италија
ГРУПА 7: Данска, МАКЕДОНИЈА, Швајцарија, Финска
ГРУПА 8: Шведска, Црна Гора, Романија, Косово.