Шпанскиот тенисер Рафаел Надал ќе биде подготвен за настап на Австралија Опен, тврди неговиот вујко и поранешен тренер, Тони Надал.

Освојувачот на 20 грен слем титули се опоравува од повредата на стопалото на левата нога поради која предвреме ја заврши сезоната.

Шпанецот веќе тренира во својата академија во Мајрока и веќе најави дека на тениските терени ќе се врати кон средината на идниот месец, на егзибицискиот турнир „Мубадала“ кој се игра во Абу Даби.

– Мислам дека Рафа ќе биде подготвен за настап на Австралија опен. Тој тренира секој ден и верувам дека во декември ќе се врати на полните тренинзи за што подобро да се подготви за грен слем турнирот во Мелбурн – изјави Тони Надал.

Турнирот во Абу Даби треба да се одржи од 16 до 18 декември, додека стартот на Австралија Опен е закажан за 17 јануари идната година.