Срѓан Ивановиќ

Екипата на Дино Баскет од Кочани е првак на Македонија во конкуренција на кошаркари помлади од 14 години. Сепак, од тимот на Работнички чии таленти загубија во финалето, реагираа до јавноста укажувајќи на низа на неправилности.

Од Работнички се сомневаат дека најмалку двајца кошаркари на Дино Баскет се повозрасни од пропишаната возраст, а во Македонската кошаркарска федерација се регистрирани со фалсификувани патни исправи.

– Станува збор за фалсификувани лиценци и бараме да се казни одговорното лице за овој фалсификат. Антиќ, Гечевски и останатите од новото раководство крајно време е да го средат овој хаос во македонската кошарка. Имавме легитимно право да не го играме овој меч, но не сакавме да им го убиваме натпреварувачкиот дух на нашите младинци – соопштија од клубот на Работнички.

Од редовите на скопскиот прволигаш се пожалија и на тоа дека во салата во Кочани, не биле поставени стандардни семафори за мерење на нападот, што внело забуна кај нивните кошаркари.

Во наредните неколку дека од МКФ ќе треба да се произнесат по жалбата на Работнички, по што ќе се разреши и сомневањето во годините на двајцата кошаркари на Дино Баскет.

Македонската кошаркарска репрезентација да потсетиме, во една прилика беше казнета со ределегација во Дивизија Б, поради тоа што од ФИБА утврдија дека неколку наши репрезентативци настапувале за јуниорски селекции со фалсификувани патни исправи.