Во неизвесен финиш момците од „Градски парк“ го скршија отпорот на ТФТ (66:62), и го продолжуваат походот кон куп трофејот.

Капитенот на Работнички, Ефремовски реализираше 17 поени, еден помалку имаше Питс, а 14 беа дело на Мулалиќ.

На спротивната страна „дабл-дабл“ учинок запиша Смит со 15 поени и 11 скока, а Хортон имаше 13 поени и пет скока.

Димитар Мираковски, тренерот на Работнички:

– Тој што разбира кошарка разбира како е, знаеме каков противник имаме, честитки за енергијата со која играат ТФТ. Имавме мал проблем и со ротацијата, ограничен е бројот на странски играчи, ание кубуриме и со повреди на домашните. Бевме подготвени на се, но ни ’затаи’ реализација. Играчите покажаа карактер и дека можат да играт дефанзивно и тука го добивме натпреварот. Мислам дека овој прв натпревар секогаш е најтежок и психолошки, од утре натаму ќе играме подобро. Не нè интересира кој е вториот противник.

Претходно во првото четвртфинале одиграно во СРЦ „Кале“ – Скопје во драматичен финиш ФМП Академија го елиминираше Пелистер.

Останатите полуфиналист ќе ги дознаеме по одигрувањето на последните две четвртфинални пресметки: Еуро Никел – Гостивар (17.00 часот) и МЗТ Скопје Аеродром – Куманово (19.30 часот).