Претседателот на Русија, Владимир Путин денеска го потпиша новиот закон, кој предвидува затрворска казна до десет години за граѓаните што ќе одбијат да се борат, ќе дезертираат, нема да почитуваат наредби или ќе им се предадат на украинските сили.

Законот претходно беше одобрен од двата дома на рускиот Парламент. Според стариот закон, за војниците-дезертери беше предвидена максимална казна од пет години казна затвор.

По објавената мобилизација, голем број Руси ја напуштија земјата, а во десетици градови беа организирани протести, на кои беа уапсени над 1.600 луѓе.

Според активистите за граѓански права, денеска во Русија се приведени неколку лица за време на новите протести како одговор на мобилизацијата на армиските резервистите да се борат во Украина.

Според фотографии и видеа објавени од независни медиуми, демонстранти се приведени во Хабаровск, Новосибирск, Иркутск, Томск и Чита во Сибир., каде според медиумите, се случува главнината од „делумната мобилизација“ што ја нареди Путин изминатата недела. Демонстрантите носеле транспаренти на кои пишувало „Ние не сме месо”.

За денеска се планирани протести и во најголемите руски градови, Москва и Санкт Петербург.