Австрија го прогласи целото свое подрачје за „ризично“ поради појавата на високо патогениот птичји грип (авијарна инфлуенца). Одлуката е донесена откако беа потврдени случаи на оваа болест кај диви птици и на неколку големи живинарски фарми, што доведе до построги превентивни мерки.

Вирусот Х5Н1 е идентификуван во повеќе окрузи. На четири фарми во Горна и Долна Австрија беа заразени речиси 200.000 птици, кои мораа да бидат усмртени за да се спречи понатамошно ширење. Во некои делови на земјата, како округот Амштетен во Долна Австрија, армијата е вклучена во деконтаминација на теренот.

Мерките вклучуваат задолжително држење на живината во затворени простории за сите фарми со повеќе од 50 птици и забрана за исхрана на отворено. Во 25 општини, особено во делови од Штаерска, Корушка, Бургенланд, Долна и Горна Австрија, се применуваат дополнителни рестрикции за да се спречи ширењето на вирусот во останатите делови на Австрија.

Засилена е употребата на заштитни мрежи за да се спречи контактот меѓу домашната живина и дивите птици.

Иако вирусот главно напаѓа птици, постои теоретски ризик од пренос на луѓе, особено кај лица што се во директен контакт со заразени птици. Но, австриската Агенција за здравје и исхрана (АГЕС) потврди дека вирусот тешко се пренесува од птици на луѓе и дека досега во Европа не е забележан ниту еден таков случај.

Министерствата надлежни за ова прашање инсистираат на придржување до сите воведени мерки и прописи за да се намали ризикот од ширење на болеста. Постои, исто така, обврска за пријавување мртви водни птици и грабливки до локалните власти. Се препорачува пронајдените птици да не се допираат сѐ додека не пристигнат стручни екипи за нивно отстранување и тестирање. Ваквата ситуација бара висок степен на претпазливост и постојана процена на ризикот за да се реагира навреме на какви било промени во епидемиолошката состојба.

Австриските весници известуваат дека околу 80 отсто од живинарскиот фонд во Австрија е осигурен преку посебни осигурувања субвенционирани од државата и покраините, со што се олеснува финансискиот товар за погодените фармери.