ПСЖ не заврши со трансферите сезонава, сака да го договори играчот на Милан во зимскиот преоден рок
Францускиот ПСЖ во летниот преоден рок предизвика вистински фудбалски земјотрес со ангажирањето на Лионел Меси, Серхио Рамос и Џанлуиџи Донарума како слободни играчи, а за Ашраф Хакими плати обесштетување, сега е во контакт со Милан во врска со трансферот на Франк Кеси кому на крајот од сезонава му истекува договорот.
Репрезентативецот на Брегот на Слонова Коска го носи дресот на Милан од 2017 година и во неколку наврати јавно изјавуваше дека сака да остане во таборот на „росонерите“ до крајот на кариерата, но не е подготвен да ја прифати платата која му ја нуди италијанскиот тим.
Италијанските медиуми пренесуваат дека спортскиот директор на ПСЖ, Леонардо веќе го контактирал својот колега во Милан, Паоло Малдини и му предложил трансферот да биде реализиран во зимскиот преоден рок.
Така би профитирал и Милан бидејќи ќе добие одредена сума на пари за обесштетување бидејќи договорот на фудбалерот истекува на крајот од сезонава.
Преговорите на Кеси со Милан се во застој бидејќи фудбалерот бара осум милиони евра, сума која не му одгововара на италијанскиот тим кој нуди два милиони помалку. Од друга страна, ПСЖ е подготвен да му исполни желбата на Кеси и сака да потпише повеќегодишен договор.