Прво Куп финале за Блокотехна
Екипата на Блокотехна е првиот финалист во кошаркарскиот Куп на Македонија откако во полуфиналната пресметка го совлада Гостивар во 92:87. Кошаркарите на Блокотехна до победата дојдоа благодарение на пресвртот во второто полувреме, се вратија од двоцифрена негатива (36:23, 54:44 на полувреме) и со посигурна игра во финишот успеа да дојде до триумфот.
– Им честитам на моите играчи и навистина не знам од каде им е силата што ја најдоа по пеколниот период кој е зад нас. Ќе ни биде тешко во финалето, но ние и во други слични ситуации сме правеле подвизи така да излишно е да кажуваме дали и колку сме изморени. Морам да го истакнам Војче Левкоски, кој беше нашиот херој вечерва. По два месеци пауза, само со еден тренинг дојде да ни помогне и донесе неверојатна енергија – изјави тренерот на Блокотехна, Марјан Илиевски.
Брендон Пен со 30 поени беше прв играч на Блокотехна, Думиќ даде 17 поени а двоцифрен учинок уште имаа и Лефковски со 12 и Младеновиќ со 11 поени.
Ефиани со 20 поени беше најдобар поединец во редовите на Гостивар.