Како што и се најавуваше претходно со практични проверки и тестирање за лиценцирањето на првите тројца Македонци кои ќе се лиценцираат за ЕБСА снукер тренери под раководство на Братислав Крстев, Асистент главен тренер на ЕБСА.

После спроведените практични проверки и тестирање од страна на Крстев, Снукер Асоцијацијата на Македонија ја информира јавноста дека со гордост ги претстави првите лиценцирани снукер тренери на Македонија.

Тие се Лазар Лазаревски, Петар Колоски и Павле Данилов.

– Голема благодарност до сите кои помогнаа во овој проект за доброто на снукерот на Македонија – информираат од Снукер Асоцијацијата на Македонија.

Воедно Асоцијацијата ги поканува сите заинтересирани в недела на индивидуални тренинзи со гостинот од Бугарија од 11.00 часот во „Гран Клуб“ – Скопје.

На истата локација во периодот од 15-17 ноември ќе се одржи вториот турнир на Националното првенство.

Да додадеме уште дека претходно се одржа обука и сертификација за снукер судии под раководство на овластен снукер инструктор од ЕБСА, Пролетина Величкова од Бугарија.

Ана Србиновска, Лазар Лазаревски и Александар Ставриќ се стекнаа со лиценца за меѓународни судии, додека Влатко Зарлинов и Марија Лебамова се здобија со лиценца за национални судии.

– Огромна благодарност за помошта и присуството на Десислава Божилова при обуката што за нас беше од непроценливо значење да имаме такви снукер судии кои се од светски ранг – велат од македонската снукер асоцијација.