Првите берби стигнаа на зелените пазари: Кочанскиот домат – 150 денари за килограм
Цената на кочанските домати на зелените пазари е 150 денари за еден килограм. Продавачите на зелените пазари велат дека набавната цена е висока затоа што ова се првите домати што излегуваат од нашите оранжерии.
– Многумина велат дека продаваат домашен домат, ама не е така. Неодамна излегоа првите домати од оранжериите од Кочани, а првата берба секогаш е најскапа, иако вкусот станува се подобар со секоја наредна берба. За неделава ги очекуваме доматите од оранжериите во Гевгелија – вели еден од продавачите на скопскиот Зелен пазар.
Увезени домати, пак, може да се купат по 60 денари за еден килограм. Ниска е цената и на увезените краставици, и таа на пазарите е 40 денари за килограм, а првите скромни количини на домашни краставици не можат да се најдат по цена пониска од 70 денари.
Зелените пазари веќе се преполни и со младите кромидчиња и лукчиња и тие се продаваат по 10 до 15 денари за врзол.
На пазарите цела зима можеа да се купат пиперки и тоа од секаков вид-црвени, зелени, чили, „бабури“ со цени над 200 денари, а сега веќе зелените оранжериски пиперки се продаваат по 160 денари за еден килограм, а парче лута пиперка има и по 7 денари.
Младата зелка се продава по 40 до 50 денари за еден килограм, а зелените салати ги има по цени од 20 до 30 денари за парче.
Забележливо е посакпувањето на овошјето на зелените пазари. Јаболката се продават по 35 до 40 денари за еден килограм, портокалите по 40 денари, а штотуку пристигнатите јагоди се со цени околу 150 денари за едно пакување.