Првиот ЛГБТИ хотел во Куба повторно ги отвори вратите за туристите
Хотелот „Gran Muthu Rainbow“ во Куба повторно ги отвори вратите откако беше затворен поради пандемија. Хотелот со пет ѕвезди е првиот „ЛГБТИ-френдли“ хотел во оваа карипска земја, а гостите се првенствено странци, пренесува Франс24.
Куба сака да привлече секаков вид туристи, а сопствениците на овој хотел се надеваат дека го отвориле патот за заемно задоволство, како за нив, така и за гостите.
По десет месеци Куба ги отвори границите за странските посетители.
Меѓу првите туристи кои пристигнале во хотелот биле гостите од Канада, кои овој хотел го сметаат за голема предност.
„Хотелот е феноменален. Ова е одличен додаток на Карибите, особено на Куба“, изјави Канаѓанецот Ерик Хилер.
Неговиот сограѓанин Кевин Мекграт се надева дека хотелот ќе придонесе во борбата на ЛГБТИ заедницата во Куба за нивните права. „Ова е навистина одлична работа и се надевам дека ќе ја инспирира владата да направи позитивни промени за ЛГБТИ заедницата, за нивните права, како и други позитивни промени на островот“, вели задоволен гостин на хотелот.
Кубанците се надеваат дека нивниот парламент ќе го преиспита референдумот за законитоста на истополовите бракови до крајот на годината. Доколку Собранието го одобри барањето, граѓаните би можеле да излезат на референдум во 2022 година.