Денеска во четвртото коло од Првата македонска лига се одиграа три натпревари, во скопското дерби Работнички ремизираше со Вардар (1:1).

Головите беа реализирани во текот на второто полувреме, Вардар кој го доби шампионскиот трофеј за минатата сезона дојде во водство преку Мицевски во 59 минута. „Романтичарите“ се спасија од пораз благодарение на Станковски во 76 минута за нивно второ реми по ред во шампионатот.

Дури во четвртиот натпревар од лигата Академија Пандев успеа да го запише првиот погодок, а истиот доволен и за првите три бода сезонава остварени против Струга Трим Лум. Радост за „пандевци“ во 85 минута донесе Крстовски, а за стружани ова е вториот пораз.

И во последниот трет дуел од саботната програма Македонија ЃП им се врати на победите, откако со 2:1 славеше над Беласица. Уште во третата минута „лавовите“ од Ѓорче Петров имаа предност преку Емини, но нивната радост траеше само четири минути, бидејќи за нов егал се погрижи Каланоски.

Клучниот момент за победа на домашната екипа се случи во 36 минута кога во листата на стрелците се запиша Божиновски.