Прва радост за Е. Пелистер во ЕХФ Европската лига
Ракометарите на Еурофарм Пелистер во третото коло ја остварија првата победа во ЕХФ Европската лига откако вечерва како гости со 27:30 го совладаа АЕК Атина.
По три кола, Еурофарм Пелистер има учинок од по една победа, реми и пораз со кои засега е третопласиран на табелата во групата Д.
Битолчани сосема заслужено дојдоа до првата европска победа оваа сезона откако во текот на сите 60 минути беа подбар тим и ги диктираа играта и резултатот.
Единствен пат кога АЕК имаше нерешен резултат беше на самиот почеток кога израмнија на 1:1. Оттогаш, се беше во рацете на битолчани, прво со серија од три гола поведоа со 1:4, а по десет минути игра предноста се зголеми на пет гола (4:9). Предноста на полувремето се намали на три гола (13:16) пред се поради слабото издание на голманите кои немаа одбрана во воведните 15-тина минути.
Во второто полувреме, ракометарите на Жељко Бабиќ рутински ја одржуваа предноста која се движеше од три до пет гола и на крајот сосема заслужено славеа со 27:30.
Јосип Периќ со осум постигнати голови беше најефикасен кај Еурофарм Пелистер, одличен беше и Табоада со шест гола, а голманот Секели имаше десет одбрани.
Следен предизвик за ракометарите на Е. Пелистер е натпреварот против Татабања кој ќе се игра за седум дена во Битола.