Прва кражба на ковид вакцини: Украдени три шишиња со 18 дози во Полска
Првата кражба на вакцини против коронавирусот е регистрирана синоќа во Полска, кога непознати лица упаднале во центарот за вакцинација во Илово-Осада на северот на земјата и ги украле сите три шишиња со 18 дози колку што имало во фрижидерот.
– Кражбата ја пријави вработен во центарот. Утврдено е дека се украдени три шишиња со вакцини против коронавирусот, односно 18 дози, изјави портпаролот на локалната полиција, Јустина Новицка за телевизијата „Полсат“.
Во Илово-Осада живеат околу 3.000 луѓе и крадците ги украле вакцините за најстарите жители на кои веќе им е даден датум за вакцинација, па морале да го одложат, пренесе полското радио РМФ.
Полска почна со вакцинација, како и останатиот дел на Европската Унија (ЕУ) на 27 декември, а од понеделникот се вакцинираат највозрасните Полјаци кои аплицирале за вакцинација.
Досега, според денешните податоци на полското Министерство за здравство, вакцинирани се 905.500 лица од кои 123.000 ја примиле и втората доза.