Прва европска титула за македонската тенисерка Митевска
На 36 Меморијален турнир „Славој Гребло“, прва категорија, во Врсар (Хрватска) младата македонска тенисерка Сара Митевска за натпреварувачки до 12 години успеа да го освои првото место.
Митевска во поединечнаа конкуренција најпрвин беше слободна во првото коло од турнирот, потоа во четвртфиналето со резултат 2:0 во сетови 6:0 и 6:0 ја елиминираше Хрватката Ела Јамник.
Во полуфиналниот меч со 6:0 и 6:2 нашата тенисерка славеше против домашната натпреварувачка Реа Годиниќ, а во финалето триумф над уште една Хрватка, со 4:6, 6:3 и 11:9 против Софија Сантос.
Ова е прва европска титула за македонската тениска надеж Митевска.
Освен од Македонија и Хрватска, на овој турнир имаше и учесници од Црна Гора, Србија, Велика Британија, Италија, Косово, Естонија, Словачка, Словенија, Романија, Германија, Шведска, Франција и Русија.