Прв училиштен ден: Насмевките на децата видливи и под маските (ВИДЕО)
Од денеска започна новата учебна година, а учениците до трето одделение со маски и максимално почитување на препораките за заштита од ковид-19 се упатија кон училиштата во придружба на своите родители.
Наставната година е поинаква од сите претходни досега, а поголемиот дел од наставата ќе се одвива онлајн, освен за учениците до трето одделение, како и за оние средни училишта ширум земјава кои добија дозвола да организираат настава со физичко присуство.
Во училиштето „Ѓорѓија Пулевски“ во Аеродром, првачињата, но и сите останати ученици до трето одделение, пристигнаа во училиште, поделени во повеќе групи и во различно време, со цел да се избегне групирање.
Директорот на училиштето Марјан Јовановски истакна дека е задоволен од тоа како поминува првиот училиштен ден, а изрази и надеж дека така ќе биде и во иднина.
– Kако што гледате, денеска е првиот училиштен ден, поразличен од сите останати години. Приемот на учениците кои се со физичко присуство се одвива непрекинато, мирно, се гледа задоволство и кај наставниците и кај учениците. Протоколите се запазени, бариера за дезинфекција на стапала, дезинфекција на раце има поставено на влезот од училиштето, а се врши и мерење на телесна температура. Има и претставници на МВР кои се овде превентивно. Можам да кажам дека досега сѐ се одвива во најдобар ред – изјави директорот Марјан Јовановски.