Неколку илјади лекари и студенти на медицина протестираа денеска во цела Италија барајќи реформа на образованието во тој сектор, посебно поголем број стипендии за специјализација.

Стотици млади лекари од општа пракса и студенти се собраа во Милано и ги фрлија долу своите бели мантили. Некои носеа транпаренти со натписи: „Без лекари ви преостануваат само чуда“ и „Кој ќе ве лекува утре?“.

Идентична глетка имаше и во Рим пред Парламентот. „Без стручњаци, системот се урива“, „Без стручњаци, ќе ве лекуваат министри“, пишуваше на нивните транспаренти.

Протестот е организиран во 21 италијански град, меѓу другите и во Неапол, Болоња, Џенова, Торино, Фиренца и Палермо.

Младите лекари и студенти од последните години на студии дадоа огромен придонес во текот на пандемијата од коронавирус и тие бараат подобро вреднување на нивниот труд.

„Да тргнеме од податокот дека до 2025 година повеќе од 60 отсто од нашите колеги специјалисти и лекари од општа пракса ќе отидат во пензија. Со оглед на моменталната здравствена ситуација, нема да има доволно персонал за замена. Правото на нега и здравјето на сите граѓани ќе биде загрозено“, се истакнува во соопштението на организаторите.

„Повеќе не прифаќаме да не нарекуваат херои, зошто лекувањето е наша животна определба. Не сакаме да ни ракоплескаат само сакаме да се признаат нашите права“, се заклучува во соопштението.