Пронајден спортистот од Уганда кој исчезна, Јапонците го враќаат дома
Спортистот од Уганда, 20-годишниот Џулиус Секитолеко кој минатата недела избега од тренинг кампот на својата репрезентација во западна Јапонија е пронајден и ќе биде вратен во Уганда, соопшти амбасадата на оваа африканска држава во Токио.
Секитолеко денеска е пронајден во префектурата Мија, а амбасадата на Уганда наведе дека секое прашање за избегнување на должноста која требаше да ја изврши во Јапонија и исчезнувањето од тренинг кампот, ќе биде решено кога ќе се врати во татковината, пренесе агенцијата Кјодо.
Секитолеко исчезна минатиот петок од градот Изумисана во префектурата Осака, и тоа откако остави порака во хотелот „дека сака да работи и живее во Јапонија бидејќи животот во Уганда е многу тежок“.
Секитолеко секако оваа недеа треба да се врати во Уганда будејќи не успеа да обезбеди учество на Олимписките игри во својата дисциплина, кревање товар.
Тој во петокот со воз заминал за Нагоја, а имал мобилен телефон со него, но пасошот му останал кај олимписката делегација на Уганда која во Јапонија пристигна на 19 јуни.