Промовиран е театарскиот практикум „Од игра до претстава“

Првиот театарски практикум во земјава на авторите Игор Ивковиќ и Афродита Кирјаковска беше промовиран во средата во младинскиот центар „Матично“. Изданието го промовираа актерката Снежана Конеска – Руси и Милка Тримчевска, наставник по македонски јазик. Настанот се одржа со почитување на мерките за заштита од коронавирусот.

Игрите се дел од десетгодишната пракса на Здружението за културно-уметничка едукација, односно неформалното Училиште за театар „Од игра до претстава“. Публикацијата е наменета за деца од предучилишна и училишна возраст, за нивните обучувачи и за сите кои сакаат низ креативните театарски игри да ги откриваат тајните на сценската уметност. Она што е интересно е дека театарски практикуми се реткост во државава.

Во практикумот се поместени стотина практични театарски игри, поделени во осум тематски целини. Целта, како што соопштија авторите, е да се поттикне креативноста, личните емоционални, интелектуални и социјални компетенции кај децата и младите.

Промоцијата на театарскиот практикум „Од игра до претстава“ се одржа во младинскиот центар „Матично“

– Би го нагласила и физичкото воспитание и моторниот развој. Преку овие игри децата развиваат и просторна ориентација, логичко размислување и будат креативност. Театарските игри од оваа книга поттикнуваат и развој на вербално изразување и го развиваат и подобруваат изразот на нивното тело. Децата стануваат емпатични и стекнуваат поголема самодоверба, дури и интровертните, истакна промоторката Тримчевска.

– Практикумот на Ивковиќ и Кирјаковска е методолошки беспрекорен, имено затоа што е спонтан и едноставен, „испилен“ од долгогодишната вежбовна пракса низ која овие двајца педагози успешно „израснале“ десетици/стотици дечиња, напиша театрологот д-р Јелена Лужина.

Како што посочи Руси на промоцијата, публикацијата е чекор кон запознавање, стекнување вештини за одреден уметнички профил и дава можност за натамошно образување и стручно профилирање.

Иако проектот е замислен како дел од неформалното образование, авторот Ивковиќ додава дека целта на овој практикум е да се покаже дека постои кадар што може да состави програма за театарското образование да биде воведено во образовниот систем во државава. Практикумот е објавен со поддршка од Министерството за култура во рамките на Годишната програма за проекти од национален интерес за 2021 година.

Видео на денот