Промовиран е проект што ја афирмира современата културна вредност
Промоцијата на проектот „Експериментално издание на публикација – монографија“, проследен со изложба на Дејан Иванов-Маргуш, во организација на „Три Де дизајн медија“ се одржа на 27 октомври во Домот на Армијата на РСМ во Скопје.
Целта на овој автономен, истражувачки и интердисциплинарен дизајнерски проект е да овозможи афирмација на уметници од РС Македонија, така што секоја година ќе истражува и колектира податоци од творештвото на еден автор, кој направил импакт во културните текови во нашето општество, и ќе ги публикува.
Истражувачките монографии на уметниците имаат за цел ефективно и иновативно да ги соберат опусот на дејствување и креациите на уметниците, да ги афирмираат и етаблираат како современа културна вредност. Проектот е осмислен да биде долгогодишна дизајнерско-креативна дејност, која ќе се повторува секоја година за различен уметник.
Постоењето на ваков афирмативен проект ќе овозможи промоција на наши уметници и нивно претставување пред јавноста, но ќе биде дел и од културното наследство на земјата. Промовирајќи ја работата на културно-уметничките работници ќе се промовираат културата, духот и живеењето на земјата.
Проектот „Експериментално издание на публикација – монографија“ е поддржан од Министерството за култура на РСМ, како проект од национален интерес за 2020 година.