Скопскиот џез-фестивал ги промовираше календарите за 2021 година. Во нормални услови промоцијата се случува со многубројни посетители и џез-концерт на македонски изведувачи, но годинава поради пандемијата календарите беа претставени со пригодно и пријатно онлајн дружење во амбиентот на „Литература.мк“ во „Скопје сити мол“.

Главните „виновници“ за оваа убава и раритетна скопска џез-традиција, Оливер Белопета и Костадин Шурбановски, зборуваа за почетоците на идејата за СЏФ-календар, за уметничката фотографија, за нејзиниот однос со музиката, за подвигот на октомвриското фестивалско издание одржано во услови на пандемија, а со неколку внимателно избрани концертни снимки не потсетија и на некои од најубавите моменти од 39. Скопски џез-фестивал, овековечени во новиот календар преку извонредните фотографии на Татјана Ранташа. Календарите се дел од визуелниот идентитет на Скопскиот џез-фестивал.

(Текстот е објавен во „Културен печат“ број 65, во печатеното издание на „Слободен печат“ на 23-24 јануари 2021)