Биографска книга за некогашниот пратеник во Собранието и претседател на Демократската партија на Македонија, Томислав Стојановски-Бомбај, кој почина лани во март, ќе биде промовирана во четврток, на 9 февруари. Книгата насловена „Сеќавања на еден енергичен и исполнет живот“ ја подготвија ќерката на Стојановски, Марија, и неговата сопруга Вера.

-Книгата е компилација на неговиот живот и на животните случувања околу нас, а изобилува со сериозен фонд на фотографии, медиумски написи и стенограми, велат од семејството на некогашниот истакнат политичар, педагог и општествен работник.

Томислав Стојановски-Бомбај е роден 1940 година во Тетово, а завршил Машински факултет. Беше основач и претседател на Демократската партија на Македонија (ДПМ), а беше избран за пратеник од редовите на ДПМ на изборите во 1994 година.

Во Тетово Стојановски беше познат и како долгогодишен директор на Средното земјоделско училиште „Моша Пијаде“ во Тетово. Бил и директор на енергетското одржување на некогашниот текстилен гигант „Тетекс“. Откако се пензионираше, Стојановски го основа Тетовскиот фолк-фестивал што се одржуваше во манастирскиот комплекс во селото Лешок.

На Бомбај постхумно му беше доделено признанието на Општина Тетово „19 ноември“ за животно дело во областа на општествениот развој.

Почина поранешниот пратеник Томислав Стојановски-Бомбај