На промоцијата на тактилните слики присуствуваше секретарот на Националниот сојуз на слепи, г. Стерја Димов, и дел од членовите на сојузот, чија бројка беше значително редуцирана поради почитување на протоколот за посета на музеи. Секоја тактилна слика има свој QR код кој се поврзува со видеата на знаковен јазик и со аудиоматеријалите, кои музејот ги промовираше по прогласувањето на вонредната состојба.

– Чест ни е што Археолошкиот музеј е прв во Скопје, каде дел од експонатите се претставени преку тактилни слики и се изложени во постојаната поставка, а со тоа музејот станува попристапен и им овозможува на слепите лица и лицата со оштетен вид да се запознаат со богатото културно наследство. Наша главна цел и приоритет за оваа и наредната година е целосна реализација на препораките и насоките дадени во анализата за пристапност, како и зголемување на бројот на тактилни слики – изјави директорката на Археолошкиот музеј, д-р Славица Бабамова.

Слепите лица преку допир на релјефната површина можеа да ги доловат експонатите, како „Бокалот Изник“, кој е редок примерок во светот и од истиот постојат само три, „Големата Мајка“, вотивни релјефи, теракотна икона, накит од средновековен период и останати артефакти. На овој начин им се овозможува на сите лица со различни видови попречености да се запознаат со богатото културно наследство, кое е изложено во постојаната поставка на музејот.

– Особено нѐ радува што во РСМ музејската дејност се унапредува на ниво на западноевропските земји. Она што нашите членови, слепите и слабовидните лица имаа можност да го почувствуваат со срцето во земјите од Европската заедница станува реалност и секојдневие и тука. Ако човек за миг ги затвори очите и со прст почне да ја „отчитува“ сликата ќе увиди дека Браевите релјефни слики се толку професионално изработени и дека истите се оригинални реплики. Дури и човек со оштетен вид може во својата замисла да ја нацрта оригиналната слика, а доколку една слика допре до секој поединец тогаш допрела до душите на многу лица.

Чест и задоволство ни е што се унапредува музејската дејност во најстариот, Археолошки музеј во поглед на лицата со оштетен вид. Само преку почитување на правата на лицата со попреченост ќе создадеме едно општество за сите. Ги покануваме сите лица со оштетен вид, но и сите граѓани да го посетат Археолошкиот музеј, да погледнат една поинаква музејска приказна и да ги почувствуваат сликите. Едно ново утро за сите лица со оштетен вид – изјави Стерја Димов.

(Текстот е објавен во „Културен печат“ број 43, во печатеното издание на „Слободен печат“ на 8-9 август 2020)