Проблеми за Гвардиола, без клучниот играч против ПСЖ?
Манчестер сити остана без трофеј во ФА купот, но далеку поголем проблем може да биде повредата на најдобриот фудбалер на оваа екипа, Кевин Де Брујн, кој ја напушти играта на почетокот од второто полувреме.
Лидерите во Премиерлигата ги очекуваат три важни натпревари во следните две и пол недели, дерби против Тотенхем и полуфинални дуели со ПСЖ во Лигата на шампионите.
Дури и доколку повредата е релативно лесна по природа, тешко може да се очекува дека Белгиецот ќе се опорави целосно за кратко време. Ова на некој начин го потврди и менаџерот на „граѓаните“, Пеп Гвардиола.
– Утре ќе биде на лекарски прегледи, но не изгледа добро – изјави Гвардиола по мечот со Челси.
Позитивна околност е што Сити на шест кола пред крајот на сезоната во Премиер лигата му бега 11 бодови на второпласираниот Манчестер јунајтед. Првиот меч со ПСЖ во ЛШ ќе се одржи на 28 април во Париз, а реваншот е на 4 мај на „Етихад“ стадионот.