Новиот македонски кошаркарски репрезентативец Ти Џеј Шортс се наоѓа во одлична форма и тоа го докажа и на последниот натпревар од Бундес лигата во дресот на Бон против Олденбург.

Неговите фантастични игри го привлекуваат вниманието на евролигашите, а според шпанските медиуми Басконија која е во потрага по нов плејмејкер би можела да го ангажира Американецот со македонски пасош. На првите два натпревари за нашата најдобра репрезентација блескаше во победите над Данска и Норвешка во претквалификациите за ЕП 2025.

Доколку се одлучи да ја прифати понудата на Басконија, тогаш тоа ќе биде проблем за селекторот Александар Јончевски, бидејќи клубовите од Евролигата не ги пуштаат своите играчи да настапуваат за националните репрезентациите во прозорците со термини на ФИБА.

#MercadoACB– @Baskonia |Strong Interest of the club for Tj Shorts actually playing in #Germany with @TelekomBaskets. The 26 years old playmaker has the passport of North Macedonia.#Baskonia #EuroLeague #BBL #Basketball #Baloncesto #Bonn pic.twitter.com/B4VnjRcZau

— alessio teresi (@alessioteresi1) January 24, 2023

Натурализираниот македонски репрезентативец Шортс по четврти пат во последните осум кола беше прогласен за играч на колото во најсилната германска кошаркарска лига и е сериозен кандидат да биде прогласен за најкорисен играч (МВП) оваа сезона.

Во Бундес лигата има просек од 19,1 поени, 7,3 асистенции и 3,6 скокови по меч, додека во кошаркарската Лига на шампионите 24,2 поени, 6,7 асистенции и 4,2 скокови.

Во последните два натпревари најдобрите македонски кошаркари против Словачка на гости и Норвешка во Осло треба да го потврдат влезот во главните квалификации за ЕП 2025.