Тетовската полиција денеска по извршен претрес приведе 44 годишен жител на Долна Лешница кај кого се најдени над 13 илјади фалсфикувани евра и други вид материјал и документи за слични дела. Претресот и приведувањето се направени во периодот од 10 часот и 30 минути до 11 часот и 20 минути.

– Полициски службеници на СВР Тетово извршиле претрес во домот и помошни простории на Б.Џ.(44) во тетовска Долна Лешница. При претресот, реализиран со судска наредба, пронајдени му се и со потврда му се одземени за вештачење околу 13 илјади евра во апоени од 50 и 20 евра, 250 швајцарски франци, 40 кувајтски динари, поради основи на сомнение дека се фалсификувани, обрасци за дозволи за престој во Швајцарија, заштитни маркички за фалсификување на пари, хартија за фалсификување на пари и други документи, информира портпаролот на СВР Тетово, Марјан Јосифоски.

По документирање на случајот на приведениот ќе му биде изготвен соодветен поднесок согласно Кривичниот законик за „фалсификување пари” и „фалсификување исправа”.