Британскиот принц Вилијам порача вчера од својата канцеларија дека Британија е најдобра во моментите на криза, упатувајќи кон Британците уште една во низата на пораки со кои кралската фамилија настојува да ја поттикне нацијата во кризата предизвикана од пандемијата на коронавирусот.

Кралицата Елизабета минатата недела два пати се обрати на своите граѓани, а нејзиниот син, принцот Чарлс, кој беше позитивен на коронавирусот, упати неколку видео и аудио пораки откако се излечи.

Принцот Вилијам својата порака ја упати на денот кога бројот на починати во Британија поврзани со заразата Ковид-19 надмина 10.000 лица.

„Мислам дека Британија го покажува своето најдобро лице кога е соочена со кризи“, кажа принцот за време на разговор со локално хуманитарно здружение во северна Англија кое ги води банките со храна и доставува оброци на луѓето кои се во изолација.

„Сите тогаш се поврзуваме заедно и тој дух на заедништво ни дава мотивација повеќе од било што друго“, кажа Вилијам за време на повикот.