Во пресрет на 66-то издание на „Евровизија“, македонската претставничка Андреа ги засилува подготовките за Торино. На сценските движења работи со Билјана Пашариковска.

„Ова е многу личен проект и одлучивме луѓето кои ме познаваат најдобро да бидат дел од него. Билјана е човек кој не само што ми помага да ја почувствувам сцената како мој дом, туку ми дава и поддршка и стабилност. За сценскиот настап не би откривала многу, освен дека акцентот е ставен на мојата автентична експресија и движењата само ја поддржуваат“ – изјави Андреа.

Младите вокалистки Ана Петановска и Рената Кралевска ќе бидат придружни вокали на нашата евровизиска претставничка во Торино. Андреа го сподели и видеото од нив три како ја исполнуваат евровизиската „Еуфорија“ на шведската претставничка Лорин, која победи во 2012

 

View this post on Instagram

 

A post shared by Andrea (@andreamusic20)

Ана Петановска е матурантка во гимназијата „Јосип Броз Тито“ во Скопје. Професионално со музика се занимава 5 години, а од својата најрана возраст активно е музички ангажирана преку учество во бројни музички натпревари. Минатата година беше учесник на „Аларм“ фестивал и настапуваше на Василичарскиот концерт со Македонската филхармонија.

Рената е македонски пејач и автор со бројни национални и интернационални достигнувања во кариерата. Во сите свои проекти се потпишува како автор, вклучувајќи и песни за други македонски и странски изведувачи. Моментално студира соло пеење на отсекот за популарни жанрови при Музичката академија во Скопје.

Андреа пак, стајлингот целосно и го довери на стилистката Цаци Паковска, со која работеше и на видеоспотот за „Circles“.

Добар тренинг за она што ја очекува Андреа во Торино се и промотивните настани, а по гостувањата во Црна Гора и Романија, следни на агендата се Лондон, Тел Авив и Мадрид.

„Мразот го скршив во Романија каде за прв пат ја испеав песната во живо. Тремата ја победив и сега само преостанува да вежбам и да излезам на 12. мај како најдобрата верзија од себе “-искрено вели Андреа.

„Евровизија“ годинава ќе се одржи во две полуфиналиња на 10 и 12 мај и едно финале на 14 мај, а Андреа настапува во втората половина на второто полуфинале на 12 мај.

Разговор со Андреа во пресрет на Евровизија: Кога веруваш во себе и својата песна, тоа е доволно!