Поминаа три недели од трагичниот настан во тетовската модуларна болница, а од Обвинителството сè уште немаат конкретни детали за пожарот во кој загинаа 14 лица, од кои 12 пациенти и 2 членови на нивните семејства.

Од Основното јавно обвинителство велат дека се прибираат вербални и материјални докази. Извештаите од наредените вештачења до овој момент сè уште не се пристигнати кај нив.

Форензичките извештаи и анализите на вештачењето за пожарот во модуларната болница во Тетово се при крај, изјави вчера премиерот Зоран Заев, кој очекува тие да бидат објавени час поскоро.

– Колку е поскоро, толку подобро, за да ги решиме сите дилеми. Животот продолжува, политичарите се во кампања, се случуваат секојдневни активности. Ред е да се објави тој извештај за да можам и јас да го кажам својот став по повод понудените оставки од министерот и заменик-министерот – рече Заев.

Јавното обвинителството формирало работна група за овој случај. Обвинители од гостиварското и од скопското Вишо јавно обвинителство ќе бидат дел од предистражната постапка.

Во моментов, на предистрагата за опожарената модуларна болница во Тетово работат девет обвинители. Но, за јавноста и по три недели останува нејасно од што настанал пожарот.

Строга тајна е и одговорот на прашањето дали пристигнал извештајот на германските експерти, чијшто тим по пожарот пристигна во земјава и требаше да им помогне на македонските иследници во утврдување на причината за трагедијата.