При претресот во куќата на осомничената пратеничка на СДСМ Фросина Ременски за новата истрага за случајот „Рекет“ се најдени доверливи документи. Новата истрага за случајот „Рекет“ се води за невладината организација Меѓународен сојуз на Бојан Јовановски, чиј почесен претседател беше Фросина Ременски, објави МКД.мк.

„При претрес на домот на осомниченото лице се пронајдени документи и за нив се известени институциите од каде што потекнуваат документите и кои се надлежни за преземање на понатамошна постапка. Документите што ги наведувате во вашето прашање не се пронајдени при претресот“, се вели во одговорот до МКД.мк на Јавното обвинителство.

Според неофицијалните информации на порталот, во домот на семејството Ременски биле пронајдени доверливи документи од случаите „Монструм“, „Диво Насеље“ и преписки на поранешните први луѓе на Управата за безбедност и контраразузнавање во МВР. Обвинителството ги демантира овие информации.

Сопругот на осомничената Ременски, Јовче Ременски, беше помошник директор во Управата за безбедност и контраразузнавање.

Посочената Ременски пак по пишувањето на порталот тврди:

„Вмешувањето на името на мојот сопруг Јовче Ременски го сметам за крајно злонамерно и тенденциозно, ако се земе предвид фактот дека, документи што не смееле да бидат одземени во незаконит претрес се одземени од мене – Фросина Ременски, а не од мојот сопруг, и истите не се ниту предмет на кривично дело, ниту пак потекнуваат од кривично дело“, вели во реакцијата пратеничката.