Презентирана стратегија за локален економски развој на Битола
Денес во Општина Битола беше презентирана нацрт-верзијата на Стратегијата за локален економски развој на Битола за периодото 2023-2027 година.
Во изработката на стратегијата техничка поддршка беше обезбедена од проектот на УСАИД „Зајакнување на капацитетите за искористување на ресурсите” а во нејзиното изготвување учествуваа претставници од бизнис секторот, Регионалната стопанска комора, советниците од Битолскиот совет и претставници од невладиниот сектор.
„Процесот на изработка беше воден од градоначалникот Тони Коњановски со локалниот Економско-социјален совет, при што е воспоставена соработка со универзитетот, Агенцијата за вработување, Центарот за развој на Пелагонискиот плански регион, невладиниот сектор, Регионалната стопанска комора. Фокусот на оваа стратегија е да овозможи поголема вклученост на бизнис секторот во создавањето на општинските стратегии, како и развојот на приватниот сектор, за да се зголеми растот, развојот и вработеноста во Битола.Визијата на Стратегијата е Битола да биде економски силна општина, со поволна бизнис клима и оптимални инвестициски можности, атрактивна културно – туристичка дестинација, општина со имплементирани зелени и енергетски ефикасни решенија и развиена инфраструктура“, беше речено на презентацијата.
Инаку, по спроведената анкета со бизнис секторот и граѓаните идентификувани се силни, слаби страни, можности и закани, за да биде одредена визијата, стратешките цели, акцискиот план, шемата за финансирање и релевантните индикатори за мониторинг.