Претседателот Стево Пендаровски одржа средба со Програмскиот колегиум на Младинскиот културен центар по повод последните случувања во МКЦ.

-Тие појаснија дека со доделениот буџет од Град Скопје за оваа година ќе се нанесе непоправлива штета на институцијата и дека со тоа целосно ќе се загрози програмското функционирање на МКЦ, како и функционирањето на ансамблите кои делуваат во установата и фестивалите со долгогодишна традиција, информираат од кабинетот на претседателот.

Претставниците на Програмскиот колегиум од МКЦ информирале и за процесот за назначувањето на в.д. директор во институцијата, кое според нив се случило со намерно заобиколување на пропишаните законски процедури и побараа поддршка од Претседателот за нивното барање – законски и отворен конкурс за директор на МКЦ.

Пендаровски за време на средбата посочил дека треба што поскоро да се најде решение за овие предизвици во рамки на законските процедури и регулативи.

Под мотото „Сите за МКЦ“ пред платото на МКЦ вчера напладне се одржа граѓански настан на кој беше изразено незадоволството од последните случувања во МКЦ, поврзани со промената на директорот и намалувањето на буџетот на Културниот центар.