Претседателот на Туркменистан Гурбангули Бердимухамедов денеска го назначи својот единствен син на клучна позиција во Владата.

Назначувањето на синот на Бердимухамедов, Сердар, за вицепремиер задолжен за економски и финансиски прашања беше објавено во владиниот дневен весник „Неутрален Туркменистан”.

Бердимухамедов (64) претседава со Владата која нема премиер, што значи дека неговиот син директно ќе му одговара.

Претходно оваа година, претседателот го назначи својот 39-годишен син за заменик-премиер задолжен за иновативни технологии, позиција што сега е укината со новиот претседателски указ.

Се смета дека синот на претседателот, кој претходно беше гувернер на регион, министер во владата и извршуваше други високи функции, ќе го наследи неговиот татко кој стана лидер на Туркменистан во 2006 година.