Претседателот на Танзанија, Џон Магуфули денеска изјави дека не е потребен карантин во неговата земја, затоа што Господ ги штител жителите од коронавирусот и оти домашните „лекови”, како што е вдишување водена пареа, се поефикасни од вакцините.

– Вакцините не се добри. Ако беа такви, тогаш ќе имаше и вакцина за ХИВ/СИДА, рече Магуфули во говор во западниот дел на земјата.

Во Танзанија, земја со околу 58 милиони жители, официјално се регистрирани само 509 лица со ковид-19 и 21 смртен случај. Соседна Кенија, која има 47,6 милиони жители, имаше 100.000 заразени и 1.700 починати лица.

– Ние Танзанијците не се заклучивме и не очекуваме да го сториме тоа. Никој нема да прогласи општ карантин, затоа што нашиот Бог е жив и тој ќе продолжи да нè штити, рече Магуфули на свечено отворање на нова фарма во неговиот роден град во областа Чато.

– Ние, исто така, ќе продолжиме да преземаме превентивни мерки, вклучително и вдишување на пареа. Вдишувајте додека се молите на Бога, молете сè додека одгледувате пченка, компир, за да можете да јадете добро и коронавирусот да не може да влезе во вашето тело. Многумина ќе ве исплашат, мои Танзанци, но мора цврсто да истраете, додаде тој.