Претседателот на Олимпик Лион, Жан-Мишел Ола сè уште не може да се помири со одлуката на француската фудбалска федерација да ја прекине Лига 1 поради пандемијата на коронавирусот.

Со одлуката на федерацијата, титулата му припадна на ПСЖ, додека Олимпик Лион е најголем губитник бидејќи по повеќе од две децении нема да биде дел од европските купови.

– УЕФА ги замоли сите да бидат трпеливи. Кога гледам како нашите лидери донесоа сосема поинаква одлука од таа  која ја препорача УЕФА се чувствувам како идиот – изјави Ола.

Франција е единствена која од петте најсилни европски лиги го заврши првенството поради пандемијата. Германија веќе одигра две кола пред празни трибини, а наскоро се очекува да се вратат и првенствата во Шпанија и Италија, додека неизвесности постојат во Англија.

– УЕФА го објави медицинскиот протокол, но ние во Франција не го ни погледнавме. Тоа е апсолутен скандал. Исто така парадоксално е држава како Шпанија каде има повеќе смртни случаи од Франција, реагира и успеа да најде начин да го врати фудбалот – додаде Ола.