Претпремиерата на албумот „Македонисимо“ ќе се одржи во струшкото село Збажди

Пијанистот Симон Трпчески со диригентот Давид дел Пино Клинге

Македонскиот пијанист од светски глас, Симон Трпчески, ја заврши својата концертна сезона 2021/22 со блескави настапи на четири континенти само во последниве 30-ина денови, а веќе ја најавува македонската претпремиера на својот извонреден проект „Македонисимо“, известија од „КултурОп“.

Со почит кон своите корени, македонскиот пијанист Симон Трпчески реши македонската претпремиера на својот драгоцен проект „Македонисимо“ да ја изведе во автентичното опкружување на родното место на неговиот татко, живописното струшко село Збажди, сместено во пазувите на областа Малесија, на планината Караорман.

Во предвечерието на големиот христијански празник Голема Богородица, на 27 август од 17.30 часот, Трпчески и пријателите пред љубопитната публика не само од овој крај, ќе изведат прилагодена програма од албумот „Македонисимо“ што го обиколи светот – проект во чии рамки на оригинален начин се обработува македонската народна музика од страна на нашиот композитор, Панде Шахов, кој, како што вели Трпчески, „со својот посебен музички јазик ја обои на многу поинаков начин, испреплетувајќи со нашата традиционална музика различни музички стилови“.

Македонисимо

Уникатниот тим на „Македонисимо“ квинтетот го сочинуваат и Александар Краповски на виолина, Александар Сомов на виолончело, на кларинет, саксофон и на кавал Хидан Мамудов, а зад удиралките е Влатко Нушев, посочија од Здружението за култура и уметност „КултурОп“.

Инаку, Трпчески ја заврши својата концертна сезона 2021/22 со концертот на 5 август на светски познатата сцена „Театро Колон“ во Буенос Аирес, што „Нешнл Џиографик“ ја вбројува во десетте најубави оперски сали во светот.

На своето деби пред одушевената аргентинска публика, Трпчески заедно со Филхармонискиот оркестар на Буенос Аирес под диригентската палка на перуанецот Давид дел Пино Клинге, го изведе Вториот концерт за пијано и оркестар од Рахмањинов.

Концерт на Симон Трпчески на сцената „Театро Колон“ во Буенос Аирес

На овој концерт му претходеа и аплаузите и овациите што Трпчески само во последните 30-тина дена ги собра на сцените на уште три континенти: во Хрватска (рецитал во Загреб во рамките на „Гричките вечери“), Јужна Кореја (со рецитал и на барање на публиката повторна изведба на „Македонисимо“), Соединетите Американски Држави (со Грант Парк оркестарот на престижната отворена сцена во Чикаго), а во Отава, Канада во рамките на „Камерниот музички фестивал“ се случи и северноамериканската премиера на проектот „Македонисимо“.

Видео на денот