Пресврт: Чави пристигна во Барселона, ќе разговара и со Лапорта
Иако пред неколку дена објави дека потпишал нов договор со катарскиот Ал Сад, Чави Ернандез, се уште се споменува како најсериозен кандидат за наследник на тренерот на Барселона, Роналд Куман кој си оди по крајот на сезоната.
Дополнително масло во огнот долеаја двата каталонски весници „Мундо Депортиво“ и „Спорт“ кои објавија дека Чави пристигнал во Барселона, и тоа на одмор, но сигурно ќе има средба со претседателот Жоан Лапорта.
– Навистина не знам ништо, дојдов во Барселона на одмор. Не знам ништо – изјави Чави по пристигнувањето во Барселона.
Весниците тврдат дека Чави сигурно ќе има средба со Лапорта со кого е во добри односи. Имено Чави беше капитен на Барселона кога доминираше во европскиот и светски фудбалер, а на чело на клубот беше токму Лапорта.
Според весникот „Спорт“, поранешниот капитен на Барселона би требало да го наследи Куман на клупата иако неодамна потпиша нов договор со Ал Сад. Според весникот, во договорот наводно има клаузула со која на Чави му дозволува да си замине од Ал Сад само доколку добие понуда од Барселона.