Каталонските сепаристи кои се бореа за независност од Шпанија во 2017 година добија казни до 13 години затвор од Врховниот суд во Мадрид. Според „Блумберг“, оваа одлука која е без преседан дополнително ќе ги влоши односите во веќе нестабилниот регион.

Поранешниот каталонски вицепремиер, Ориол Хункерас ја доби највисоката казна, додека осум други активисти заработија затворски казни во период меѓу девет и дванаесет години за нивното учество во референдумот, кој според шпанските власти, беше нелегален.

„Одлуката за отцепување на Каталонија и самиот референдум предизвикаа немири кои ја потресоа Шпанија во 2017 година“, стои во изјавата на судот во Мадрид.

Карлес Пуџдемон, лидерот на регионот кој беше лицето на движењето за независност на Каталонија, останува во егзил во Брисел, откако ја напушти Шпанија пред две години.

Во Барселона, главниот град на Каталонија, групи на демонстранти одржаа мирни протести на главната железничка станица, пред да бидат отстранети од полицијата. За денес се очекуваат нови демонстрации.