Канадскиот премиер Џастин Трудо изјави дека првите дози на анти-ковид вакцината на „Фајзер“ и на „БајонТек“ пристигнале во државата и уште денеска може да бидат аплициртани првите дози, откако националниот здравствен регулатор во минатата среда ја одобри заедничката вакцина на американскиот производител и на германскиот партнер во проектот.

Вакцините се наменети за 14 пунктови за дистрибуција во земјата. Квебек се очекува да биде првата провинција каде ќе се аплицира вакцината. Локалната власт објави дека е подготвена денеска да почне со имунизација на жителите на два социјални домови.

Повеќето од првичните 30.000 дози на вакцините наменети за Канада се очекува да пристигнат денеска. Канадската влада неодамна го измени договорот со „Фајзер“ и „БајонТек“ за да испорача до 249.000 дози овој месец.