Сон во неделата беше актер во немил настан во кој фудбалерот на Евертон, Андре Гомеш заработи тешка повреда на стопалото, а колку му беше тешко на Кореецот покажаа и солзите на „Гудисон парк“.

Менаџерот на Тотенхем, Маурицио Покетино размислуваше дали воопшто да го носи Сон во Белград, бидејќи фудбалерот беше во шок. А, колку му е тешко на фудбалерот на Тотенхем поради повредата на Гомеш покажа кога го постигна првиот гол на стадионот „Рајко Митиќ“ во Белград.

Тој не го славеше голот туку се упати до најблиската ТВ камера и јавно му се извини на Гомеш за повредата, но и им се заблагодари на сите за поддршката.

– Ми беше многу тешко овие неколку дена. Многу ми е жал за несреќниот момент, но морав да се фокусирам на тимот и продолжам понатаму. Сфатив колку сум среќен поради поддршката која ја имам од навивачите и од своите соиграчи. Гестот по постигнатиот гол беше вистински одговор за сите луѓе кои ме поддржаа – изјави Сон.