Прекината седницата за одлуките за вонредна состојба, продолжението дополнително ќе биде закажано

Собранието денеска ја почна седницата на чиј дневен ред беа ставени петте одлуки за прогласување вонредна состојба поради пандемијата предизвикана од КОВИД-19, но расправата по нив не почна бидејќи седницата беше прекината по усвојувањето на две одлуки за формирање и изменување на состав на собраниски работни тела.

По усвојувањето на дневниот ред, пратениците ги усвоија Предлог одлуката за изменување на одлуката за избор на претседатели, заменици на претседателите, членови и нивни заменици на Комисиите на Собраниетона Република Северна Македонија, како и Предлог одлуката за основање делегации, пратенички групи, и други облици на остварување меѓународна соработка на Собранието на Република Северна Македонија Поднесена од претседателот на Парламентот Талат Џафери.

По ова, Џафери ја прекина седница и рече дека пратениците дополнително ќе бидат информирани за продолжението. За попладне најави одржување седница на чиј дневен ред е и изборот за потпретседатели на Собранието.

Во меѓувреме, најави Џафери, ќе се одржи и состанок на координаторите на пратеничките групи и претседателите на собраниските комисии, што било договорено на вчерашната собраниска координација.

Пред почетокот на оваа седница од Пратеничката група на ВМРО-ДПМНЕ најавија дека ќе гласаат против потврдувањето на петте одлуки за вонредна состојба што ги донесе претседателот на државата Стево Пендаровски поради пандемијата предизвикана од КОВИД-19, поради тоа што, како што рекоа, тие не биле искористени за целта за која биле донесени, туку биле злоупотребени од Владата.

Петте одлуки за вонредна состојба беа донесени на 18 март, 16 април, 16 мај, 30 мај и 15 јуни, поради пандемијата од КОВИД-19.

Одлуките ги донесе претседателот на државата Стево Пендаровски, бидејќи во тој период Собранието беше распуштено заради одржување на предвремените парламентарни избори што првично беа закажани за 12 април, а потоа поради пандемијата беа презакажани и се одржаа на 15 јули.

За овие одлуки потребно е да гласаат 80 пратеници. Станува збор за две одлуки за вонредна состојба во траење од по 30 дена, две од по 14 и една одлука за вонредна состојба во траење од 8 дена.

Почитуван читателу,

Нашиот пристап до веб содржините е бесплатен, затоа што веруваме во еднаквост при информирањето, без оглед дали некој може да плати или не. Затоа, за да продолжиме со нашата работа, бараме поддршка од нашата заедница на читатели со финансиско поддржување на Слободен печат. Станете член на Слободен печат за да ги помогнете капацитетите кои ќе ни овозможат долгорочна и квалитетна испорака на информации и ЗАЕДНО да обезбедиме слободен и независен глас кој ќе биде СЕКОГАШ НА СТРАНАТА НА НАРОДОТ.

ПОДДРЖЕТЕ ГО СЛОБОДЕН ПЕЧАТ.
СО ПОЧЕТНА СУМА ОД 60 ДЕНАРИ

Видео на денот