Австрија преговара со Русија за купување на милион дози од вакцината „Спутник V“, која сè уште не е одобрена од Европската агенција за лекови (ЕМА), соопшти канцеларијата на канцеларот Себастијан Курц.

Курц е под голем број на критики од опозицијата, затоа што неговата влада не купила доволно вакцини преку централизираниот систем на ЕУ, додека Курц тврди дека системот потфрлил, пренесува Хина.

– Не смее да има геополитичка тесноградост кога станува збор за набавка на вакцини, рече Курц, додавајќи дека Австрија преговара со Русија за набавка на вакцината и дека Москва понудила да испорача милион дози од април.

– Единственото нешто што треба да е важно е дали вакцината е ефикасна и безбедна, додаде Курц.

Вакцината „Спутник V“ досега е одобрена во 58 земји.

Врз основа на последните клинички испитувања во февруари, научниците утврдиле дека ефикасноста на „Спутник V“ е 92 проценти. Резултатите од студијата беа објавени во стручното списание „Лансет”.

Од земјите на ЕУ, само Словачка и Унгарија ја купија руската вакцина, а Унгарија веќе ја администрира. Во Словачка, сепак, ова прашање предизвика политичка криза.